اهلا انا اسمى ناريمان انا وزوجى علاء عايشين فى بيتنا المتواضع فى احدى المدن الجديده بعيد شويه عن العاصمه لكنه بيت جميل جدا وفيه جنينه عايشه انا وهوا وقطه اسمها بابسى الى مجننانا لغاية دلوقتى وبغبغان صغير, علاء اصر يشتريه بس هوا بغبغان دمه خفيف وبيدحكنى كتير .. المهم فى يوم كنا رايحين فيه لوالدتى لانها كانت عازمانا طلبنا اوبر لان عربية علاء كانت بتتصلح,, ولبسنا واتشيكنا لحد ما سواق الاوبر وصل لسه طالعين لقينا القطه بتجرى ورا البغبغان وراسها والف سيف تقريبا تاكله او تعوروه مش عارفه لكن جوزى اتخض وقرر انه يطلع ورا القطه وياخدها ويحطها ف الجنينه بعيدا عن البغبغان بدل ما تؤذيه
⇓⇓⇓⇓⇓⇓⇓⇓⇓⇓⇓
وانا جوه العربيه والسواق بيبصلى قلتله "معلش هنستنى جوزى شويه انا اسفه" بس اتكسفت اقله اصله بيجرى ورا قطتنا والكلام دا فكدبت كدبه بيضه وقلتله "معلش اصل جوزى بيدى لماما الدوا وهيجى حالا" وانا ببتسم ابتسامه هاديه !! والسواق بصلى وقالى "مفيش مشكله اهم حاجه رضا حماته عليه دا بالدنيا"!! وهوا بيبتسم تانى وبعديها بص قدامه وفجأه دخل عليا علاء جوزى ووشه محمر جدا وعرقان ومتنرفز وقام قال الاتى:
⇩⇩⇩⇩⇩⇩⇩⇩⇩⇩⇩⇩⇩
علاء : معلش اتأخرت اصل بنت الكلب كانت مستخبيه تحت السرير واضطريت اضربها على دماغها بالمقشه عشان تطلع حاولت تعضنى الجزمه بس انا لفيت البطانيه حواليها وشيلتها من اوضة النوم ورميتها فى الجنينه حبستها هناك لحد اما نرجع ياريت بس متشخلناش فى الجنينه زى المره الى فااتت !!..
مش هقدر اوصفلكم تعابير وش سواق الاوبر هسيبها لخيالكم☺☺☺☺☺☺
0 تعليقات