انا وزوجتى عندها قط.. ايوا عندها مش عندنا لانى مش بطيقه! شعره فى كل حته حواليا لغاية سريرى ورزل ودايما يقعد مكانى وحاسس انه لو كان عنده ايدين زينا كان استولى على ريموت التلفزيون وبقى هوا قط البيت.. المهم قلت لزوجتى انا هتخلص من القط دا .. وبعد مجادلات ومشاورات وتحكيم دولى وافقت لكنها اتحدتنى انى اعرف اتوهه وأن دا اذكى قط ممكن اشوفه فى حياتى
قلتلها اكيد طبعا وبلا بلا بلا اخدتها على قد عقلها وابتدت الحكايه..
⇩⇩⇩⇩⇩⇩⇩⇩⇩⇩
اول يوم اخدته وحطيته فى القفص ومشيت بيه تقريبا بعيد عن البيت مسافة 3 شوارع وبعدين فتحت القفص وسيبته يطلع وغفلته وهوب مشيت بسرعه المهم لقيته بيجرى بعيد وسبقنى مش عارف هوا رايح فين مش مشكلتى فى داهيه! المهم بعد عنى وقعدت ادنجل كدا لحد ما وصلت البيت لقيت مراتى بتدحك وبتشورلى على القط واتارى الباشا وصل البيت قبلى...!
⇩⇩⇩⇩⇩⇩⇩⇩⇩⇩
تانى يوم اخدته مسافه اكبر قول مثلا 6 شوارع ابعد ونفس الى حصل المره الى فاتت حصل طبق الاصل..
تالت يوم اخدته مسافه ابعد وبارده نفس الى بيحصل بيحصل تانى لدرجة انى حسيت انه مخاوى ولا الى عندى توأم زى حسام وابراهيم ومراتى بتشتغلنى ومفهمانى انه قط واحد!! او انها بتتواصل معاه بالافكار زى افلام الخيال العلمى ولا فعلا القط دا عبقرى زى ما قالتلى وانا مستهتر بيه !! فقررت الاتى
⇩⇩⇩⇩⇩⇩⇩⇩⇩⇩
رابع يوم اخدت الباشا وانا بقول لمراتى المره دى اخر مره لو رجعلك تانى يبقى هوا كان ليكى من البدايه وهتحتفظى بيه زى ما اسامه منير مقال وانا الى همشى وربنا !! ودخلته القفص وركبت العربيه وقررت انى امشى بيه مسافه ابعد!! المهم تقريبا مشيت كيلو او اتنين بالعربيه روحت يمين فى شمال فى يوتيرن فى ادغال طلعت الجبل نزلت النفق وفتحت باب العربيه فجاه بس وهيا واقفه ورميته واديت امريكانى وطلعت بالعربيه خطف فى ثانيه الا ثانيه..
⇩⇩⇩⇩⇩⇩⇩⇩⇩⇩
وعشان الحظ المنيل بنيله العربيه عطلت منى فى حته مقطوعه فنزلت وقررت ارجع للبيت مشى 
.
.
بس مش عارف ارجع منين عمال امشى وانا مخبط اطلع هناك ولا ارجع منين وحاجه هباب والدنيا حر عدت عليا ساعه قلت اتصل بمراتى اطمنها عليها !
بس قبل ما اعمل كدا لقيتها هيا الى بترن عليا!! فتحت السكه وقلت:
انا: الو ايوا ياحبيبتى معلش انا هتأخر عليكى حبه " وفجأه ومن غير حلفان سمعت صوت خلى شعر راسى يقف لقيت صوت مواء فى السماعه ومراتى بتقلى ..
مراتى: انت فين ياحبيبى دا القط معايا هنا بقاله شويه وانا قلقت عليك جدا!! 
مش عارف اوصفلكم مشاعرى واحاسيى بس سيطرت على قد ما قدرت على اعصابى وقلتلها
انا : هوا القط بتاعك بتاعك دا الى انا اخدته فى العربيه عشان اسربه عرف يرجعلك !!
مراتى : ايوا والله بقلك عندى اهو بقالو شويه انت فين!! ؟؟
اخدت نفسى وقلتلها ..
انا: طب ياحبيبتى انا تايه فبعد اذنك اديله السماعه عشان يقلى ارجع البيت ازاى!!
0 تعليقات