قصه ساخره عن بطه بتشتغل دكتور سنان!!

حد يعرف فيكم يعنى ايه بار مان

!! ايوا انا الراجل الى بيعد المشروبات  الروحيه !!!  افتكر اخر اسبوع ليا فى الوظيفه دى قبل ما اسيبها لانه كان اسبوع اشبه   بافلام الكارتون!!   فى شهر مايو وقت ما كان السيرك الدولى مأجر الارض الى قصادنا وبيعمل عروضه.

                                            ⇩⇩⇩⇩⇩⇩⇩⇩⇩⇩

                     وكنت بشرب خمور بشكل دورى

لكن فى  اخر فترات شغلى كنت بقيت بشرب كتير اوى  !! لغاية ما  جربت نوع من انواع المخدرات مش هذكر اسمه عشان معملش ليه دعايه بس هوا بيتمزج بالواين وليه طريقة تحضير معينه كدا زى فيلم الفيل الازرق  و الى ادهونى حذرنى اشربه فى الشغل لان تاثيره رهيب!

                                            ⇩⇩⇩⇩⇩⇩⇩⇩⇩⇩

المهم بعد الفجر على الساعه 6 صباحا والدنيا فاضيه  ريحت على الكرسى بتاعى فى البار وعملت كاس ومزجته بنوع المخدرات  وبعدين هوب بلعت الكاس دفعه واحده!  .

واستنيت كدا دقيقه بس محصلش حاجه ولا حسيت بأى تغيير  ولا اى دماغ عادى  جدا  بصيت على الساعه  وقررت اقفل المكان  وبالفعل  كنت على استعداد للخروج بس للاسف لقيت زبون داخل ..

كان الزبون بيقرب منى بس مشيته غريبه كأانه بيعرج و بيقرب منى واحده واحده وملامحه بتوضح وفجأه لقيت قاعد  قدامى بطه وبيطلب عصير وحاجه ياكلها!!

                                            ⇩⇩⇩⇩⇩⇩⇩⇩⇩⇩

عزيزى القارىء انت مقرتش حاجه غلط ايوا (بطه) بطه زى دونالدك كدا بس لابس  تى شيرت احمر وبنطلون جينز ازرق

بصتله  و ابتديت احس ان نفسى بيتقل وباخده بصعوبه وقلتله:

انا: حضرتك عاوز عصير وحاجه تاكلها !👻👻

البطه : ايوا !!

انا: بس حضرتك احنا بار هنا مش مطعم بس ممكن اقدملك عصير لكن اكل لا!

البطه: اوكى كفايه العصير اصل انا مش لاقى حد فاتح غيركم دلوقتى!

جبتله العصير وقدمته ليه وانا بتأمله وحاسس انى رجلى بقت زى لوح التلج بس قلت اتعرف عليه اكتر..

                   انا: حضرتك مش ملاحظ انك مختلف شويه؟!

البطه: مختلف ازاى يعنى !!

انا : انت حضرتك بطه وبتتكلم وبتشرب عصير كل دا ومش شايف  ان فيه حاجه غريبه!!!

البطه:  هوا حضرتك عنصرى؟؟! ايه المشكله انا بطه وبتكلم وبشرب عصير وبقرأ جرايد وكمان بشتغل دكتور اسنان  !!

وعمال يخرط قدامى بالكلام وانا اسمعه وبعدين افتكرت  انى معايا تليفون مدير السيرك الى قصادنا وفكرت كدا مع نفسى وقلت بطه بتتكلم وبتشرب  عصير وبتقرا جرايد! دا اكيد السيرك هيدفع دم قلبه عشان يشغل الدكتورالبطه دا عنده .. فتحت تليفونى رنيت على المدير الى كان  شكله تقريبا نايم ورد عليا وهوا زهقان وحكيتله الموضوع وفضل ساكت فتره لغاية ما سألنى:-


           مدير السيرك :بطه بتقرا جرايد !انت فين دلوقتى؟تمام انا  هاجى   بنفسى اشوف البطه دى !! وانا موافق اشغلها عندى واعرض عليها الوظيفه!

                                            ⇩⇩⇩⇩⇩⇩⇩⇩⇩⇩

المهم قفلت  معاه  ورجعت للبطه لقيته بيجهز نفسه عشان يمشى فقلتله:

انا:  استنى حضرتك انا عندى ليك عرض لن تتخيله

البطه: ايه؟

انا : عرض عمل حضرتك هتشتغل فى السيرك☺

البطه : السيرك!!

انا: ايوا

البطه: السيرك دا  الى فيه حيوانات مفترسه فى اقفاص!

انا : اه

البطه: السيرك دا الى فيه بهلونات واكروبات!

بدات اتنرفز بشكل غريب ورديت:- 

                                          ااااااه!

البطه : السيرك دا الى فيه خيمه كبيره ومأجر الارض  الى قصادكم!

رديت عليه تانى وانا تقريبا بيغمى عليا :

انا : اااااااااااااااه!!

البطه : طب السيرك عاوز دكتوراسنان يعمل بيه ايه!!

                                          ⇩⇩⇩⇩⇩⇩⇩⇩⇩⇩

 فى غرفة العنايه وعلى وشى قناع الاكسجين  ومربوط  فى ايدى  اسلاك وواير كتير ومنظم للقلب وحكايه!!

سمعت اتنين رجاله بيكلمو الدكتور:

مدير السيرك::  كويس انى جيتلك فى الوقت  المناسب انا لقيته مرمى على الارض وماسك فيك  وبيقول بطه بطه بطه !!

دكتور السنان: انا زى ما بقول لحضرتك كدا هوا كان تمام معايا وبيقدملى عصير وهادى جدا وبعدها لقيته ماسك فيا وراسه والف سيف انى انا بطه وانا احلفله انى دكتور سنان محترم!! وهوا  يقلى لا انت بطه وهتشتغل فى السيرك!!

طبيب العنايه:   دا انكتبله عمر جديد وواضح انه تعاطى انواع مختلفه من المخدرات سببتله الهلوسه دى..

ومن اليوم دا قررت انى ابعد عن  شغلة البار مان دى والمخدرات وتوبت الى الله وجبت تاكسى وشغال  عليه تمام الحمد لله..

تنويه لا للمخدرات لانها تدمر الصحه والمال والحياه انت اقوى من المخدرات