كنت بشتغل فى حضانه متوسطة المستوى لكنها جميله واشتراكها مش غالى اوى من زمان وحصلى موقف يدحك بعد تقريبا مرور شهر عليا فى الحضانه جات المديره المسئوله تشوف الاولاد وتراقب تطورهم وطريقى تدريسى ليهم ..
واقفه بكل ثقه وشموخ قدام حوالى 15 طفل والمديره المسئوله فى الحضانه , والاولاد الى فيها كلهم مهذبين ومهندمين المهم ابتديت اتكلم معاهم شويه واشرح ليهم مسائل حسابيه جمع وطرح سألت طفل اسمه مودى .. لو بابا يامودى اشترالك قطه وكمان قطه وكمان قطه يبقى عندك كام ؟؟
مودى : يبقى عندى 4
روحت للوايت بورد وكتبتله المسأله عشان تبقى اسهل عليه وقلتله
انا : ركز معايا يامودى بابا اشترالك قطه + قطه + قطه يبقى كام قطه عندك ؟
مودى: يبقى عندى اربعه
لاحظت المديره انها بتبصلى وانا بدأت اشعر بالحرج شويه قلت اشرح مثال تانى مكتوب بارده
انا : خلاص ياحبيبى سيبك من القطط خالص لو بابا اشترالك تفاحه + تفاحه + تفاحه يبقى عندك كام تفاحه ؟؟
مودى: يبقى عندى تلاته
انا: برااافو يامودى شطور طيب بابا اشترالك قطه + قطه + قطه يبقى كام قطه عندك ؟
مودى: يبقى عندى اربعه
بصتله حتة دين بصه وانا مش عارفه ادحك ولا اتعصب وقلتله" ياحبيبى انت جيبت القطه الرابعه دى منين!!" المهم رد عليا وقالى
مودى: مانا عندى قطه فى البيت اسمها كايلا وا..وا..وا وقعد يحكيلى عنها
فى الاخر طلعت انا الى غلطانه ☺☺☺☺☺☺
0 تعليقات